Assam : Madan Kamdev-a inngaizawng kal te RSS in enthla dawn
Rashtriya Swayamsevak Sangh (RSS) leh Bajrang Dal chuan thuchhuah siamin Assam-a archeological site Madan Kamdev, “Assam’s Khajuraho” tia hriat bawka inngaizawng kal te chu an enthlak dawn thu an sawi.
Madan Kamdev hi Assam state khawpui Guwahati aṭanga darkar khat kal vel niin Hindu hmun pawimawh a ni. Erotica lam hawi lung inker te a awm avangin helai hmuna nula leh tlangval inngaizawng kal te a ni lo zawnga hun hman ching an awm leh zeuh zeuh ṭhin avangin temple thuneitute leh RSS te bakah Bajrang Dal te chu an ngaihdan a ni lo hle a, hemi avang hian thuchhuah hi an siam ta a ni.
Madan Kamdev Devalaya Management Committee chuan naupang zawkte chu puitling zawk ten helai hmuna an kal dawn a nih chuan hruai se an duh thu leh, school leh college anga an tlawh a nih pawhin kaihhruaitu ṭha tak awm se an duh thu an sawi bawk.
MKDMC secretary leh RSS member ni bawk Nanda Barua chuan naupang zawkte chuan helai hmun thianghlimna hi an zawm tawh loh thu sawiin Temple chu mawi lo taka khawsak nan an hmang ṭhin tih a sawi a, inngaizawng a ni lo zawnga khawsa an man chuan police kuta an hlan dawn thu a sawi a ni.
Chief priest Haren Sarma pawhin helai hmun hlutna hi a bo telh telh thu leh nu leh pa te pawhin an fate thil nihdan phung an zirtir thar leh a ngai tawh takzet tih a sawi bawk.