Tripura-ah TMC-in kum 2023-ah sorkarna a siam dawn : Abhishek Banerjee

All India Trinamool Congress (AITC) general secretary Abhishek Banerjee chuan Pathiannia Tripura-a rally a neihnaah, kum 2023 state assembly inthlan neih turah TMC chuan hnehna changin sorkar an siam dawn tih a sawi.

Abhishek Banerjee chuan West Bengal-a TMC sorkar inrelbawlna ṭha tak ang chu kalpuiin, Tripura-a BJP rorel dan dik lo tak chu tihtawp a tiam.

Agartala-a Rabindra Shatabrshiki Bhaban (Tagore Centenary Hall)-a pungkhawmte hmaah, Banerjee chuan BJP-in Tripura-a thuneihna a chan aṭangin dan leh thupek a tlachhia a, hmasawnna hmuh tur a awm lo tih a sawi. Inthlan dawna BJP thutiam zawng zawngte chu a lem a ni tiin, kum thum leh a chanve thuneihna an chan hnuah pawh an thutiam hi an tihhlawhtling thei lo tih a sawi bawk.

"BJP hi double engine sorkar tiin an sawi a, mahse West Bengal-a TMC sorkar leh Tripura leh centre-a BJP kaihhruai sorkar report card-te chu khaikhin ila, Tripura leh ram pum huapah hmasawnna mumal tak hmuh tur a awm lo a ni," a ti.

November 25-a Tripura civic poll inthlan neih turah TMC chuan seat zawng zawngah a chuh dawn a, kum 2023-a assembly inthlan neih tura pawh BJP paihthla turin an bei dawn tih Banerjee chuan a sawi. "Theihtawp kan chhuah a, BJP hi kan hneh ngei a ngai. Anih loh chuan Tripura hi Afghanistan ram ang maiah a awm ve dawn a ni. BJP hruaitute chuan Taliban style-in TMC activist-te bei turin an party worker-te an fuih a ni,"tiin a sawi.

Abhishek Banerjee-a'n Pathiannia rally a huaihawt tum hi Tripura police-te chuan an remti lo a, mahse High Court lamah a thlen hnuah court chuan rally huaihawt hi a phalsak ta a ni.

Pathiannia TMC rally huaihawtah hian BJP national executive member, West Bengal minister hlui Rajib Banerjee leh Tripura-a BJP MLA Ashis Das-te pawh an tel. Rajib Banerjee hian kumin January thla khan TMC aṭanga BJP a zawm hnuah, TMC-ah hian a kir leh a, MLA Ashis Das pawhin tun hnaiah TMC hi a zawm bawk.