Manipur-ah MSME-in hna nuai 1 dawn siam tawh

Manipur chief minister N Biren Singh chuan an state-ah Udyam portal-a in ziak lut, Micro, Small and Medium Enterprises, (MSME) 11,172 chuan kumin July thla thleng khan hna nuai khat dawn an siam hman tih a sawi.

CM chuan hmarchhak state zingah Manipur chu MSME resigtration ti tamna ber zingah telin, Start-Up Manipur, TRIFED leh thil dang hmanga hmalakna rah chu an hmu ṭan tih a sawi.

October 31 thlenga Udyam Registration portal data-a a lan danin, Manipur aṭangin MSME register hi 16,187 awm tawhin, heng zingah hian micro unit 15,984, small business 195 leh medium enterprise pariat an tel. Hmarchhak state zingah Assam chu Udyam portal-a MSME registration ti an tam berin, unit 56,658 an awm a, Manipur hian a dawt a ni. Tripura-ah 5,135 MSME register an awm a, Mizoram-ah 2,283, Nagaland-ah 2,156, Arunachal Pradesh-ah 1,841, Meghalaya-ah 1,568 leh Sikkim-ah 1,109 an awm.

Udyam portal hi sorkar laipuiin Udyog Aadhar Memorandum (UAM) thlakna tura kum 2020, July 1-a a siam a ni. Kumin October 31 thleng khan ram pumah MSME register hi nuai 54.68 an awm tawh.

Prime minister Narendra Modi pawhin Manipur-a MSME-ten hna nuai khat dawn an siam avang hian a zinna aṭangin a lawmpui thu pawh a sawi. State hmasawnna tura MSME sector tichak tura theihtawp chhuah zel turin a chah bawk a ni.