Assam CM hoin high level meeting-ah vaccine sem dan thlir ho

Assam chief minister Himanta Biswa Sarma kaihhruaiin state chhunga Covid-19 vaccination campaign kalpui thlirin high-level meeting neih a ni. State sorkar chuan vaccine campaign hi nasa taka kalpui a, hri leng thawh thumna a thleng leh a nih loh chuan khuahkhirhna khauh tak siam a tum tawh lo a ni.

State nodal officer of Covid-19 vaccination, Munindra Nath Ngatey chuan vaccine dose khatna la tawh, mahse a dose hnihna la chhunzawm mai lo tam tak an awm tih sawiin, heng mite hnenah hian dose hnihna hi la thuai tura hriattirna SMS pawh an thawn chhuak ṭhin tih a sawi. September thla laihawl thleng khan second dose lak hun tawh, la chhunzawm lo hi mi nuai nga vel an awm.

Ngatey chuan vaccine dose hnihna an lak hun pel tawh pawh pek chhunzawm zel an ni dawn tih a sawi a, mahse vawi eng emaw zat hriattir hnuah pawh mi tam tak chuan an la chhunzawm duh lo tih a sawi.

Pathianni thleng khan Assam-ah hian vaccine dose khatna la hi mi vaibelchhe 2.01 an awm a, dose kima la hi mi nuai 80.67 an awm tawh bawk. Ni khatah vaccine hi dose nuai hnih te pek hman niin, November thlaaah state chhunga vaccine la thei chin, mi vaibelchhe 2.10 chu pek kim hman an tum a ni.