Hmarchhak state 3-ah rorellai party leh an thawhpuite an chak

Hmarchhak state pathum - Assam, Meghalaya leh Mizoram-a assembly by-election result chu nimin khan puan a ni. Hemi rual hian state danga assembly leh Lok Sabha by-election result pawh puan nghal a ni bawk.

Assam-ah assembly seat panga- Gossaigaon, Bhabanipur, Tamulpur, Mariani leh Thowra; Meghalaya-ah pathum - Mawryngkneng, Rajabala leh Mawphlang, Mizoram-ah seat pakhat- Tuirial bialah te by-election hi neih a ni.

Assam :
Assembly bial pangaa inthlan neihna, Assam-ah hian vote nei mi nuai riat vel awmin vote tla hi 73.77% a tling a, candidate 31 an awm. By-election neihna bial pahnih hi bialtu MLA pahnihte thih vang niin, a dang bial pathum hi bialtu Congress MLA pahnih leh All India United Democratic Front (AIUDF) MLA pakhatin BJP zawm a, MLA an nihna aṭanga an ban vang a ni thung.

By-election neihna hoah hian rorellai, Bharatiya Janata Party (BJP) leh a thawhpuite chuan hnehna an chang vek. BJP hian seat thum lain, a thawhpui United People's Party Liberal (UPPL) in seat hnih an la a ni. Bhabanipur, Mariani leh Thowra bialah BJP candidate-te chu thlan tlin niin, Gossaigaon leh Tamulpur-ah UPPL candidate-te an tling bawk a ni. BJP MLA atana thlan tharte hi kumin March-April thlaa party dang hminga lo thlan tlin tawh, BJP an zawm avanga bang ta leh, BJP ticket-a ding leh ta a ni.

Meghalaya :
Meghalaya-a by-election neihna, assembly bial pathumah hian vote nei 1,02,695 awmin, vote tla hi 80.86% a ni a, candidate 13 an awm. Heng bial pathumte hi bialtu MLA-te an thih avanga inthlan ṭhat neih ngai an ni.

Rorellai, National People's Party leh Meghalaya Democratic Alliance (MDA) sorkar hnuaia a thawhpui, United Democratic Party (UDP) chu seat thumah chak vekin, NPP hi Rajabala leh Mawrynkneng bialah an chak a, UDP in Mawhphlang-ah hnehna an chang ve bawk.