AP: Zirtirtu Opium addict-te DDSE in warning pe

Arunachal Pradesh-a Longding Deputy Director of School Education (DDSE) Mongal Taki chuan tunkar tir khan thupek khauh tak tichhuakin zirtirtu opium addict-te chu warning a pe.

DDSE chuan zirtirtu opium addict-te chu sim nghal tura hriattirin an sim lo a nih chuan an lakah hremna khauh taka lekkhawh a nih tur thu a sawi.

Arunachal Pradesh CBSE result ṭhatloh chhanah nu leh pate chuan zirtirtute chu mawhpuh in School Education Department-ah hian complaint an thehlut a ni. An complaint thehluhah hian district chhunga zirtirtu tam tak chu opium addict an nih thu leh an hna an thawk ṭha lo hle tih te an tarlang tel a ni.

DDSE chuan zirtirtute chu zirlaite leh society-ah pawh role model an nih thu a sawi a, thil dik lo an tih chuan midang te kawng dik loah a hruaikawi thei a ni, a ti.

Mongal Taki chuan zirtirtu ṭhenkhat chuan an tih loh tawp tur an tih thu report an dawn thu a sawi a, incheina duk dak lo nena class la te, class-a kuhva ṭhial ching te leh zirlaite hnena vaihlo lam kaihhnawih thil dil ching an awm tih complaint an dawn thu a sawi.

DDSE chuan zirtirtu zawng zawng chu hun vawng dik tur leh an mawhphurhna ngaipawimawh turin thu a pe a, thupek zawm lo te chu suspend an nih loh pawhin ban an nih dawn thu a sawi.

Zirtirtu-a ruihhlo addict an awm nia comlaint awm chu a hriatthiam loh thu a sawi bawk.

Hetih lai hian zirtirtu tam tak fel tak tak leh inpe tak tak erawh an awm tih a sawi a, zirna hmanga society hma­sawn­na thlen tu tam tak an awm tih a sawi bawk a ni.