Shillong buainaah Police 100 hliam, mi 40 man

Meghalaya state khaw­pui Shillong-a Motphran hmuna buaina chhuah aṭanga ni nga zet a liam hnu, Ningani khan official report chuan buaina chhuahnaah khan police 100 zet in hlian an tawrh thu leh mi 40 lai man an nih thu an tarlang.

SP (City), SA Rynjah chuan heng hliam tiar zingah hian mi ṭhenkhat chu an na hle tih a sawi a, mi 32 chu an hliam te ṭhui a ngaih hial thu a sawi. Amah Rynjah pawh hian hliam a tuar ve nghe nghe bawk.

Mi 40 vel an man tawh zinga 10 atanga 15 vel chu an lakah thubuai siamsak an nih dawn thu sawiin, boruak pawhin muanawm lam a pan ṭan tawh thu a sawi a, ngai an awh leh theih vat a beisei thu a sawi.

Rynjah chuan boruak pawhin ṭhat lam a pan zel beiseina vangin curfew pawh an thlahdul sawt hle tih a sawi a, buainaa inhnamhnawih tam zawk hi chuan buai chhan pawh an ngaihtuah loh thu leh an tel ve satliah thu a sawi a ni.

SP chuan buaina chhuah chhan dik tak an chhui mek zel thu a sawi a, local Dorbar Shnong ten an ṭanpuina avangin lawmthu a sawi bawk.

Hetih lai hian East Khasi Hills Deputy Co­mmissioner, Peter S. Dkhar chuan Ningani vek khan mobile internet service pekchhuah leh a nih hmain boruak awmdan an ennawn leh phawt tur thu a sawi.

Home Minister, James P.K. Sangma pawhin DC hi mobile internet service pechhuak leh turin a lo ngen tawh bawk a ni.