Assam-ah dawr 22 tichhia, mi pali man

Assam-a Guwahati Municipal Corporation (GMC) chuan Nilaini khan Fancy Bazar-a SS Road-ah dawr 22 an tichhia.

Heng dawr an tihchhiat te hi thing hmanga sak an ni a, mimal rama ding niin ram neitute hi no-objection certificate leh building permission thehlut tura thupek an ni a, GMC chuan May 4 khan kar khat chhunga an thupek hi zawm turin an ti a ni.

Nilaini khan GMC Staff leh police-te chu a hmunah kalin earth­mover nen an kal a, thupek an chhuah tawh chu kenglangin dawr tihchhiat hna hi an ṭan ta a ni. Hemi a nih avang hian police leh mi ṭhenkhat pawh an innawr buai nghe nghe.

Panbazar police-te chuan GMC staff bei nia puhin mi pali an man a, an lakah hian thubuai an siamsak bawk.

Hetih lai hian dawr nghaktu pakhat chuan kum 50 kalta chhung khan an chhungkua in helai dawr hi an enkawl tawh thu a sawi a, a nu a enkawl bakah a chhhungkaw chawm nan a hman thu leh a hnuaiah mi pahnih a chhawr thu a sawi a, dawr neitu dang pawhin a harsatna tawh ang chiah hi an tawh ve thu a sawi. Thla khat kalta vel khan GMC hnen aṭanga thupek an dawn thu leh an dawr siamna hmun chu dawr siam phal lohna hmun a nih thu an dawng tih a sawi.

Dawr neitu pakhat dang chuan GMC chuan tunhma chuan chhiah an khawn ṭhin thu sawiin kum sarih kalta vel aṭang khan an khawn tawh loh thu a sawi ve thung.

Assam Street Vendors Asso­ciation Secretary Chandan Gos­wami chuan GMC hmalak dan chu dan kalh a nih thu sawiin, dawr neitute chuan Supreme Court-a thlen an tum thu a sawi a ni.