Assam leh Meghalaya CM-ten ramri buaina hmun tlawh dawn

Assam chief minister Himanta Biswa Sarma leh Meghalaya chief minister Conrad K Sangma-te chuan November 15 hian state pahnihten ramri buaina an neihna hmun ṭhenkhat an tlawh dawn.

State pahnihte inrina hi kum 884.9-a thui a ni a, heng zinga hmun 12-a hian buaina an nei a ni. Mahse an buaina neih zinga hmun paruk chu chinfel mai theih a nih an sawi.

Meghalaya CM Sangma chuan Assam CM Sarma nen telephone-a an inbiak thu sawiin, November 15-ah ramri hmun ṭhenkhatah joint visit neih an rel tih a sawi a ni. Mahse an hmun tlawh tur erawh a sawilang lo.

CM pahnihte hian ramri chungchanga an buaina chinfel dan ngaihtuah hian Shillong leh Guwahati-ah meeting an lo nei dun tawh a, hemi hnu hian MLA leh official-te telna regional committee-te pawh an din ve ve a ni. Heng committee-te hi ramri hrula cheng khuate tlawh a, khawchhung mipute ngaihdante la a, higher level-a ngaihtuah tura report thehlut tura tih a ni. Committee-te hian ramrite pawh hi an tlawh tawh a, October 30-a report thehlut tura tih ni mah se state pahnihah hian assembly by-election neih a nih avangin an sawn hla leh a ni. CM pahnihten ramri an tlawh hnuah report hi an thehlut ang.

State pahnihten ramri chungchanga buaina an neih nasat zualna hi Tarabari, Gizang, Hahim, Boklapara, Khanapara-Pilangkata leh Ratacherra niin heng hmun hi Meghalaya-a West Khasi Hills, Ri Bhoi leh East Jaintia hills district-a awm niin, Assam lamah Cachar, Kamrup Metro leh Kamrup district-a awmte an ni. State pahnihte hian ramri an buaina neih hi give-and-take policy hmanga chinfel an remti dun tawh a ni.