Sweeper Colony-a chengte a tahtawlin sawnchhuak dawn : Meghalaya CM

Meghalaya sorkarin Shillong-a Dalit Sikh ho chenna hmun Sweeper Colony, Punjabi Lane tia sawi bawk chu a lei fel tak avangin he hmuna chengte chu a tahtawlin sorkarin an awmna tura a ruahmanah sawnchhuah an ni dawn tih chief minister Conrad Sangma chuan a sawi.

Sorkarin thuchhuah a siamah, Sweeper Colony-a chengte hi thawh liin sawnchhuah an ni dawn a, a thawh khatna chu an zo tawh a ni.

Meghalaya sorkar, Syiem of Mylliem leh Shillong Municipal Borad chuan kumin March 31 khan helai ram, sq meter 12,444.13-a zau hi sorkar kuta hlan turin inremna an lo ziak tawh a ni.

Khasi civil society group hrang hrante chuan Punjabi Lane-a cheng Sikh-te hi sawnchhuah turin hun rei tak sorkar an lo nawr tawh a, state sorkar pawhin he ram hi Shillong Municipal Board (SMB) ram a nih thu a sawi bawk. Hetih lai hian he hmuna chengte chuan kum 1863-a Mylliem lal leh British thuneituten inrem siamin, Sikh hnam chenna tura an pek niin an sawi thung.