Rights panel-in tharum thawhna thleng chungchangah Report thehlut turin Tripura sorkar a hriattir

National Human Rights Commission (NHRC) chuan Tripura sorkar hnenah an state chhunga Muslim mite laka tharum thawhna thleng chungchang chu kar li chhunga report thehlut turin a hriattir.

Rights panel hian All India Trinamool Congress (AITC) thupuangtu leh social activist, Saket Gokhale-a'n Tripura-a politics kaihhnawiha tharum thawhna leh Muslim mite beihna thleng chungchanga complaint a thehluh bawhzuiin hriattirna hi a pe a ni.

Gokhale hian tharum thawhna thlengah state sorkar chuan pawikhawihtu lamah ṭangin ngawi rengin a lo thlir niin a sawi. Hemi chungchangah hian NHRC chu inrawlh tura ngenin, hnam leh sakhaw tlem zawkten an himna kawngah hlauhthawnna lian tak an nei tawh a ni, a ti.

Tun hnaia Tripura khawpui, Agartala leh khawpui dangah VHP leh Hindu Jagarn Manch-ten lungawi lohna an lantirnaah tharum thawhna a thleng a, Muslim mite bitumin an chenna in leh inkhawmna hmunte suasam sak an ni.

NHRC-a complaint a thehluhah, Gokhale chuan state-a rorellai, BJP worker-te chuan Trinamool Congress hruaitute pawh an bei tih sawiin, pawikhawihna thlengah hian TMC MP leh worker dang eng emaw zatin hliam an tuar a, campaign-na atana an motor hmante suasam sak an nih bakah an thilte pawh ruksak an ni bawk a ni, a ti.

Tripura High Court pawhin North Tripura, Unakoti leh Sipahijala district-a buaina chhuak chungchangah state sorkar chu November 10-ah report kimchang thehlut turin a lo ti tawh bawk a ni.