Manipur-in tribal museum 29 a hawng

Manipur-a BJP kaihhruai sorkar chuan state chhunga tribal hnam hrang hrangte ziarang leh nunphung chawilar leh humhalhna tura siam museum 29 a hawng.

Chief minister N Biren Singh chuan Nilaini khan virtual hmangin district 10-a museum 29-te hi a hawng a ni. CM chuan Manipur State Archaeology, Department of Art and Culture hmalakna hnuaiah tribal museum hi 31 siam tum a nih thu a sawi.

Nilainia museum hawn zinga paruk hi Chandel district-ah siam a ni a, Tengnoupal-ah pathum, Kangkokpi-ah panga, Churachandpur-ah paruk, Senapati-ah pathum, Tamenglong-ah pathum bakah Pherzawk, Ukhrul, Noney leh Imphal East district-ah pakhat ṭheuh siam an ni. Heng museum-te hi deputy commissioner-ten tribal hruaitute nena inberawnin an siam a ni.

Museum hawn tharte hi Anal, Chothe, Lamkang, Monsang, Moyon, Tarao, Aimol, Maring, Mate, Chiru, Kharam, Koireng, Thadou, Purum, Gangte, Paite, Zou, Kom, Simte, Vaiphei, Thangal, Mao, Maram, Inpui, Zeme, Hmar, Tangkhul, Rongmei leh Kabui hnam puala siam an ni.