Assam CM-in doctor-te thil phut tihhlawhtlin thuai a tiam

Assam chief minister Himanta Biswa Sarma chuan Assam Medical Service Association (AMSA) aiawhte nena an inkawmnaah, promotion, hlawh siam rem, medical allowance leh post ruak hnawh khat tura an phutna chu a rang thei anga tihhlawhtlin sak a tiam.

CM chuan doctor aiawhte hnenah hian an thil phutte tihhlawhtlin a nih theihna tura a rang thei anga hma la nghal turin health and family welfare department thuneitute pawh a hrilh tawh thu a sawi a ni.

AMSA hian an thil phut ngaihtuah sak tura sorkar nawrin, November 1 aṭang khan ni thum chhung atan Out Patient Department (OPD) boycott programme an nei a ni.

Sarma chuan health and family welfare department principal secretary Anurag Goel hnenah doctor-te cadre, promotion leh pay chungchang chu ennawn nghal turin a ti a, postgraduate degree nei senior doctor-te hlawh chu sorkarin a tihsan sak ngei tur thu a hrilh. Hei bakah hian in-service doctor, state chhunga medical college-a postgraduate zir chhunzawm duh tana seat awm zat 23 pawh chu tihpun a tiam bawk.