Guwahati-a supermarket flyover hawng Flyover dang pali siam leh dawn

Assam khawpui, Guwhawti-a traffic tawt lutuk tihziaawmna atana Supermarket flyover siam chu Ningani khan chief minister Himanta Biswa Sarma chuan a hawng a, he flyover hi state mipuite tan a hlan tih a sawi.

SOPD,2019-2020 hnuaiah flyover siamna atan hian cheng vaibelchhe 127.20 sen a ni a, meter 1,205-a thui niin, thla 36 chhunga zawh hman tura ruahman chu thla 22-ah an siam zo a ni. Supemarket flyvoer hi Ganesguri leh Last Gate inkarah siam niin, hei hian road traffic tawh chu nasa takin a chhawk thei dawn a ni.

Chief Minister Sarma chuan flyover hi pali dang siam a ni leh dawn tih sawiin, Sarabbhati leh Maligoan ami chu thawh mek niin kum 2023-ah zawh hman tum a ni. G. Baruah Road-Geetanagar tri-junction leh Guwahati Club-Bamunimaidan-ah siam tum a ni bawk a, DPR pawh peihfel thawhkhat a ni tawh a ni, a ti.

CM chuan Brahmaputra luia Guwahati-North Guwahati lei dawh mek chu kum 2023 December thlaah hawn a ni dawn a, Changsari-a AIIMS sak mek pawh financial year hman mekah hawn hman a nih tur thu a sawi.

Sarma chuan Guwahati chu ASEAN ramte chhuahka pawimawh tak a nih thu sawiin, khawpui infrastructure tihhmasawnna chu state pum tan pawhna hmasawnna pawimawh tak a nih thu a sawi. Ruahman lawk aia hmaa Supermarket flyover siam zawh a nih chungchangah PWD engineer-te chungah lawmthu a sawi bawk.

CM Sarma chuan national highway pawh turin Baihata-Sipajhar leh Kuruwa-Narengi-ah six-lane ring road siam tuma hma lak mek a ni a ti a, hemi atan hian DPR pawh buaipui mekin Bharat Mala Project hnuaiah hna hi thawh a nih tur thu a sawi. Hei bakah hian Brahmaputra lui chhim leh hmar lama chengte tana inkalpawh awlsam zawkna turin Narengi-Kuruwa, Guwahati-North Guwahati leh Palashbari-Sualkuchi inkarah lei dawh a ni bawk ang. Guwahati khawpui tana drinking water project thawh pawh zawhfel a ni hnai tawh tih Chief Minister chuan a sawi.