China-in AP-ah in 100 awmna khua din : US Defence report

United States Department annual report tihchhuahah, China-in Arunachal Pradesh state chhungah in 100 vel awmna thingtlang khua a din thu an tarlang.

China-India border chungchanga chapter-ah hei hi tarlangin, kum 2020 khan China chuan civil mi chenna in 100 awmna thingtlang khua chu ram pahnihte ramri chungchanga buaina an neihna, Arunachal Pradesh state leh Tibet Autonomous Region inkar, Line of Actual Control (LAC) huam chhungah a sa a ni, a ti.

Ram pahnihte hian ramri chungchanga an buaina chinfel dan ngaihtuaha inbiakna an nei reng chungin, China lam hian LAC-ah kawng hrang hrangin hma a la chhunzawm reng tiin report chuan a tarlang.

Kumin January thla khan NDTV chuan high-resolutin satellite imagery aṭangin MacMohan line chhim lam, India ram chinah Chinese khaw thar din a nih thu hi a lo report tawh bawk. He khua hi Tsari Chu lui kamah dinin, Arunachal Pradesh-a Upper Subansiri district huam chhungaha awm a ni. He hmunah hian 1962 indo hma pawh khan India leh China sipaite an lo intibuai tawh a ni. Kum 2020 hmalam kha chuan China hian helai hmunah hian military outpost te tham tak a dah chauh a, mahse kum 2020-ah khua hi dinin, India ram chinah kawng pawh a siam zui a ni.