Meghalaya tel loin hmarchhak state dangten Tuialhtheia VAT lak tihniam vek

Sorkar laipuiin Ningania tuialhtheia chhiah a lak a tihhniam hnuah state eng emaw zatin Value Added Tax (VAT) an lak an tihniam ve nghal. Hmarchhak state zingah Meghalaya tih loh state dang zawng pawhin VAT hi an tihniam a ni.

Assam chief minister Himanta Biswa Sarma chuan sorkar laipuiin fuel-a excise duty a tihniam chu lawmawm a tih thu sawiin, prime minister Narendra Modi thutlukna siam bawhzuiin Assam pawhin petrol leh diesel-a VAT a lak chu Rs 7 ve vein a tihniam tih a sawi.

Tripura chief minister Biplab Kumar Deb pawhin sorkar laipui leh Tripura sorkarin chhiah lak an tihniam chu Diwali thilpek a ni, a ti. Arunachal Pradesh leh Manipur chief minister-te pawhin sorkar laipui chhiah lak a tihhniam hnuah an state pawhin VAT an tihhniam ve nghal thu an sawi bawk.

Arunachal Pradesh chuan VAT a lak hi petrol-ah Rs 5.20 leh diesel-ah Rs 5.22 in a tihniam a, state dangte erawh chuan Rs 7 ve vein an tihniam hlawm thung.

Meghalaya hi a hma aṭangin India ram state zinga fuel-a VAT la tlem ber a ni a, petrol-ah 20% leh diesel-a 12% a la. Nimin khan state sorkar chuan VAT tihniam chungchang hi a ngaihtuah ve leh a ni.