Tripura : Social media-a thu post vangin mi 71 lakah criminal case 5 ziak lut

Tripura police-te chuan an state boruak tichhe thei leh inhuatna chawk chhuak thei zawnga social media lama thu post avangin mi 71 lakah criminal case panga an ziak lut tih an sawi.

Social media-a thu dik tawk lo thehdarh a, buaina chawk chhuak thei zawnga thu post ṭhinte lakah action na taka an lak ṭhin tur thu an sawi bawk.

State police-te chuan thubuai an ziahluhte hi tun hnaia state chhunga tharum thawhna thleng kaihhnawih chungchanga an thu post vang a nih tih sawiin, an chhui chiannaah thubuai an siamsakte hian sorkar leh state police-te tihmingchhe zawngin thlalak leh video dik lo leh siamchawpte an thehdarh tih an sawi.

Gomati district-a Kakraban area-a mosque chu suasam leh tihchhiat niin thu dik tawk lo thehdarh a ni a, mahse he mosque hi khawih a ni lo tih police-te chuan an sawi a, boruak ṭha a awm theihna atan theihtawp an chhuah thu an tarlang bawk.