Assam-in vaccine pekchhuah runpui kalpui tum

Assam state chuan November 22 aṭangin state pumah kar khat chhung Covid-19 vaccine pekchhuah runpui, mega drive neih a tum.

Stafe health minister Keshab Mahanta chuan mega drive neih hi cabinet-in a rel a nih thu sawiin, inthlan kalpui dan anga vaccination drive hi neih an tum tih a sawi. Polling booth tina voter list lakhawmin, hemi buaipui tur hian sorkar official pakhat zel dah an nih tur thu a sawi bawk.

Mahanta chuan, "Chief minister, chief secretary leh minister zawng zawng pawh polling booth an chan tur pek vek an ni ang. An chan huam chhungah in tinah kalin, vaccine la tawh leh la la lo te data an lakhawm vek dawn a ni," a ti.

State chhungah vaccine pekchhuah hna hi health department chuan a kalpui reng a, mahse mega drive ah chuan sorkar pumin hma lak a ni dawn tih Minister chuan a sawi.

Data an lakkhawmnaah hian Assam mi, state pawna awm vaccine la lote pawh chhinchhiah an ni ang. List hi sorkar laipuiah thehlutin, heng mite hi an awmna state-a vaccine pek dan ngaihtuahsak turin an ngen nghal dawn bawk a ni

Minister chuan mega drive chu state chhunga puitling chinten vaccine pek kim vek an nih theihna tura hmalakna a nih thu a sawi.

Chief minister Himanta Biswa Sarma chuan state chhunga Covid vaccine la thei chin chu nakkum January 15 ah pek kim hman an tum thu a lo sawi tawh a ni.