Meghalaya-in tuialhtheia VAT lak tihniam ve ta ; India rama petrol leh diesel tlawmna ber a ni

Meghalaya state chuan tuialhtheia chhiah, Value Added Tax (VAT) a lak chu a tihniam ta. Petrol leh diesel litre khatah Rs 5.20 ve vein a tihniam. Hemi hma pawh hian Meghalaya hi India state zingah tuialhtheia VAT la tlem ber a lo ni sa tawh a ni.

Sorkar laipuiin kar liamta Ningania tuialhtheia chhiah a lak, excise duty a tihhniam rual khan Meghalaya state tih loh, hmarchhak state dang zawng chuan Value Added Tax (VAT) an lak an tihniam ve nghal a ni.

Chief minister Conrad K Sangma hoa cabinet meeting chuan VAT tihhniam hi an rel a ni. Meeting zawhah chanchinthar lakhawmtute a kawmaah, deputy chief minister Prestone Tynsong chuan, a hmain petrol-a VAT an lak hi 20% leh diesel-ah 12 % a an lo tihhniam tawh thu sawiin, tuna an tihhniam lehna nen VAT an lak hi petrol-ah 13.5% leh diesel -ah 5% ah a tla thla tawh tih a sawi. India ramah an state chu petrol leh diesel man tlawmna ber a ni tih a sawi bawk.

Tynsong chuan tuialhtheia chhiah lak an tihhniam avang hian thla nga chhung, Novemver, 2021 - March, 2022 chhung hian state sorkar chuan cheng vaibelchhe 100 vel a chan dawn tih a sawi.