Tripura police-ten SC lawyer 4 thubuai siamsak

Tripura police-te chuan tun hnaia an state-a Muslim te laka tharum thawhna thleng chungchang, social media-a an post danah inhuatna chawh tho tumah puhin Supreme Court lawyer palite lakah thubuai an ziak lut.

West Tripura district superintendent of police, Manik Das chuan lawyer palite pawh hi hriattirna pek an ni tawh a, November 10 ah police hmaa inlan tura hrilh an ni, a ti.

Das chuan, "Supreme Court lawyer-te hian Thawhlehni liam ta khan Tripura hi an tlawh a, hemi hnu hian social media lamah tunhnaia buaina thleng chungchanga an lungawi loh thute an post zui a ni. Police-te chuan heng thute hi anmahni post ngei nge, an hmingin midangin an lo post tih kan hre duh a, thubuai pawh kan ziaklut a ni," a ti.

Supreme Court lawyer te hi Unlawful Activities Prevntion Act (UAPA) leh IPC section hnuaiah te thubuai hi siamsak an ni. UAPA hnuaia thubuaiah hian thiam loh chantir an nih chuan kum sarih thleng tantir theih an ni ang.

Tripura police-te hian UADA hnuaiah social media account holder 102-te pawh thubuai an siamsak bawk. Heng mite account hi tihtawp sak turin Twitter, Facebook leh YouTube thuneitute hnenah hriattirna an pe.