Guwahati tlangval pahnih sawisa hlum

Assam-a Karbi Anglong-ah kar hmasa Zirtawpni zan khan Guwahati tlangval pahnih chu mipuiin an sawisa hlum.

Tlangval pahnih nunna chan ta te hi Nilotpal Das leh Abhijit Nath te an nih thu report chuan a tarlang.

Das leh Nath te hi sight seeing nei turin Karbi Anglong-ah hian an kal a, khaw mipuite chuan naupang rukbo hmang nia ringin an sawisa a ni.

Mipuiin an sawisa lai hi video-a record niin social media lamah pawh a darh nasa hle a, video-ah hian Nilotpal Das zawk hian a sawisatute chu zahngaihna dilin Assamese an nih thu leh Guwahati mi an nih thu te a hrilh a, a nu leh pa hming te sawiin khawngaihna a dil a, mahse a sawisatu te chuan a thusawi chu ngaihsak lo in mau a hlap in an pet zui bawk.

An motor Scorpio pawh nasa taka tihchhiat a ni.

He thil hi Zirtawpni zan dar 7.40 vela thleng niin Dengaon, Dokmoka Police station in a huam chin chhunga thleng a ni.

Report chuan heng tlangval pahnih hian khaw mite hi Kangthilangso awmna an zawt a, mi ṭhenkhat chuan naupang rukbo ching nia ringhlel in an inhrilh kual a, darkar khat vel an thang hnua an lo let leh chuan mipuite hian an lo sawisa ta chiam mai niin a tarlang.

Das-a ṭhianpa pakhat chuan Gu­wahati aṭangin zan dar 8 velah a call thu a sawi a, midangin lo chhang­in Nilotpal Das chu thah a nih thu leh a tukah TV-ah chanchin lo ngaihven mai tura a lo tih thu a sawi.

Additional DGP (Law and Order) Mukesh Agarwal leh a naute chu chanchin an hriat velah hian a hmunah an kal nghal a, video aṭangin he thil thlenga inhnamhnawih ho hi an hriat tawh thu police-te chuan an sawi a, mahse he thu ziah lai thleng hian tumah man an la nei lo.