Assam Jogdol murder case 2009 : CBI in chhui dawn

Assam-a Jogdol thingtlang khuaa 2009 kuma tualthahna rapthlak tak thleng, chhungkaw khata member paruk awm thah an nih chungchang chhui chhun­zawmna chu CBI kutah dah a ni dawn.

Dispur official thuchhuah in a tarlan danin sorkar laipui chuan Assam sorkar in he case CBI chhui tir tura an rawtna chu an pawm tih a tarlang. Union Ministry hnuaia Department of personnel and training (DoPT) chuan state sorkar ngenna hi an pawmpui thu leh CBI kutah case hi hlan a nih thuai tur thu an tarlang a ni.

Sarbananda Sonowal kaihhruai sorkar chuan he tualthahna case hi CBI kutah dah turin sorkar laipui an lo ngen tawh a ni.

Assam Police CID-te chuan he case chhui hna hi an kalpui mek bawk. CBI hian New Delhi emaw Calcutta crime branch-ah emaw he case hi an pe maithei niin official-te chuan an sawi.

Sonapur-a Jogdol khuaah kum 2009 December 12 khan Harakanta Doloi (45) a nupui Sapna(40) leh an fate pathum bakah an nau pakhat chu mi tu tih hriat lohin an that a ni.

2014 October khan Dispur BJP MLA Atul Bora chuan Prime Minister Narendra Modi hnenah lehkha thawnin he case hi CBI kuta hlan turin a lo ngen tawh a, Bora hian a lehkhathawnah hian khatih hunlaia Assam social welfare minister Akon Bora chu a inhnamhnawih tih a ziak tel a, mahse Akon hian a pha a, politics-a inbeihna a nih thu a sawi thung.

Atul Bora chuan tualthah a nih chhan hi five-star hotel atana ram inchuh vang niin a sawi a ni.