Assam inthahnaa inhnamhnawih te kan zuah lo ang : Chief Minister

Assam Chief Minister Sarba­nada Sonowal chuan kar hmasa Zirtawpni-a Karbi Anglong-a tlangval pahnih mipuiin an sawisak hlumnaa inhnamhnawih zawng zawng chu an zuah dawn lo tih a twitter-ah a ziak.

Sarbanada Sonowal chuan mipuite chu dawt thu thehdarh lo tura chahin boruak ṭha lo siam lo turin a ngen. Guwahati tlangval pahnih thah an nih thubuaiah hian mi 16 an man tawh niin report chuan a tarlang.

Sonowal chuan a twitter-ah an sawisak hlum tak Abhijit Nath leh Nilotpal Das chhungte chu a tawrhpui thu a ziak a, an thlarau chu muang taka a chawlh a beisei thu a ziak bawk.

Das leh Nath-te hi kar hmasa khan sight seeing neiin Karbi Anglong-ah hian an kal a, Zirtawpni zan khan naupang rukbo hmanga ngaiin mipuiin an lo sawisa hlum a ni.

Assam Health Minister, Himanta Biswa Sarma pawhin Guwahati tlangval pahnih tual­thihna chu pawi a tih thu leh so­cial media-a thu dik loh thehdarh pawizia leh fimkhur a ngaih zia a twitter-ah a ziak ve bawk.

Congress leader leh Chief Minister hlui Tarun Gogoi pawhin thil thleng chu pawi a tih thu leh sorkar chu action la tura a duh thu a tarlang ve bawk a ni.