Shillong-ah boruak ziaawm tawh ; Mobile internet leh SMS la hman theih loh

Meghalaya state khawpui Shillong-a Motphran hmuna buaina chhuah vanga boruak sosang chuan ziaawm lam a pan zel a, mahse he thu ziah lai thleng hi chuan mobile internet leh SMS erawh block a la ni thung.

Buaina chhuah avang hian kar hmasa aṭang khan mobile internet leh SMS hi block a ni a, district thuneitute chuan social media leh internet lama thu dik lo thehdarh tur venna atana ti an nih thu an sawi.

Hetih lai hian report chuan boruak chuan ziaawm lam a pan viau tih tarlangin curfew an inthlahdul deuh pawhin buaina a chhuak tawh lo tih an tarlang.

Motphran-ah hian May 31 khan bus operator leh tual­chhung mite inkarah buaina a chhuak a, hemi hnu hian mipui te leh police-te chu nasa takin an innawr buai zui a ni. He thil thleng vang hian thuneitu lam chuan June 1 aṭang khan mobile internet hi an block nghal a ni.

Hetihlai hian Garo Hills lamah chuan NGO hrang hrang GSU, AYWO, FKJGP leh ADE-te chuan Tura-a GHADC office an hual a, CEM, Dipul Marak chu hmuin sitting MDC, Sofiur Rehman chu Forest Advisory Committee chair­person a nihna aṭanga ban turin an nawr a ni. Hemi anih avang buaina lian tham a chhuah loh nan GHADC huamchhungah pawh internet service ni hnih chhung block a ni ve tawh bawk.