Nagaland SSA zirtirtu te nawrh chhunzawm dawn

Nagaland Sarva Shik­sha Abhiyan(SSA) Teachers’ Association 2010 leh 2013 batch-te chuan a thawh thumna atan district hrang hrangah nawrh an chhunzawm zel dawn tih an sawi.

SSA zirtirtute hian sorkar hnen aṭanga chhan­letna lawmawm lam an dawn hma chu nawrh hi an chhunzawm zel dawn tih Pathianni khan an sawi a, an thil ngiat rei tak tihhlawhtlin la ni lo chu hlawhtlling ngei tura an nawr dawn thu an sawi a ni.

Nawrh huaihawtute hi mi 2,000 vel an ni a, June 6 aṭang khan ṭanin directorate of school education leh Kohima-a secretariat-ah te an pung­khawm a ni. Zirtirtute hian May 2 aṭanga 10 inkar khan hna thawk duh lo in a vawikhat nan nawrh an huaihawt tawh a, May 11 aṭanga 25 chhung khan class an lo boycott tawh bawk.

SSA Zirtirtute hian an hlawh chu 7th Pay Commission scale-a san tura an phut bakah January aṭanga March thla chhunga an hlawh tal chu pe turin sorkar an nawr a, an hlawh hi non-plan head-a transfer an ngiat bawk a ni.

Association chuan an thil ngiat hi appointment term ṭanchhana ngiat an nih thu an sawi a, regular basis-a thawk te hamṭhatna dawn ang a nih thu an sawi. An nawrh chuan zirlaite leh zirtirtute chu nasa takin nghawng mah se an hma lam hun an ngaihtuah ve tho thu an sawi a ni.