Hnam tlem zawkte chunga Assam sorkar chetdanah AAMSU-in PM hnenah memorandum an thehlut

All Assam Minorities Students’ Union (AAMSU) chuan Assam-a BJP sorkar chu state chhunga hnam tlem zawkte zarbuai leh inlulinga puhin, state sorkar chet dang chungchangah prime minister Narendra Modi hnenah memoradum an thehlut.

AAMSU chuan state sorkarin an awmna hmun aṭanga a hnawtchhuahte chu awmna mumal nei loa an awm mek thu te sawiin, heng mite awmna tur ram leh an mamawhte pek an nih theihna atan PM chu inrawlh turin an ngen.

September thlaa Darrang district-a Gorukhuti hmuna sorkar rama chengte chhuahtir an nihnaa sorkarin tharum a hmang chu an dem thu sawi bawkin, hemi ṭuma buaina thleng vang hian mi pahnihin an thih phah thu an sawi.

Zirlai pawl chuan PM chu National Register of Citizens (NRC) update hna kalpui ṭan tur leh, hun tiam chhunga zawhfel a nih theihna tura hma la turin an ngen bawk.

Memorandum hi New Delhi-a nawrh an huaihawtna, Jantar Mantar-a police officer-te kutah an hlan tih AAMSU advisor Ainuddin Ahmed chuan a sawi. A copy hi journalist-te hnenah an pe tel bawk a ni.