Silchar-ah Northeast Green Summit nei dawn

6th Northeast Green Summit (NGS) chu Assam-a Silchar khuaah November 16 aṭangin ni thum chhung neih a ni dawn a, he hunah hian hmarchhak state pariata forest minister-te telin hmarchhak biala sik leh sa inthlak danglam dan te, ram ngaw humhalh chungchangte an sawiho ang.

Summit-ah hian hmarchhak state minister-te bakah union minister of state for environment Ashwini Kumar Choubey bakah Bangladesh, Bhutan leh Myanmar aṭangin palai an tel dawn bawk a ni.

NSG advisory board member leh senior Indian Forest Service officer, CP Marak chuan summit chhung hian Forest Ministers’ Round Table meet neih a ni dawn bawk a, he hunah hian climate change, animal migration, state leh international border-a natural resource enkawl dan, ram ngaw leh ramsa laka pawikhawihna thleng ṭhin chungchangte sawiho a ni dawn tih a sawi. Meeting zawhah hian Silchar Declaration pawh puanzar tum a ni, a ti.

UN Environment Programme (UNEP) chuan NGS hi a hma aṭang pawhin a lo thlawp tawh ṭhin a, UNEP India head Atul Bagai chuan natural resource leh greenery lamah hmarchhak bial dinhmun chu hmun dang aiin a la ṭha a, mahse hemi rual hian global warming leh climate change avangin ruahtui tlak huna khawtlai a, nipui hun pawh a rei phah tawh a ni, tiin a sawi. Hei vang hian ram ngaw humhalh kawngah leh global warming do let tura hma lak a hun tih a sawi.