Assam sorkarin reserve forest-a chengte sawnchhuak leh

Assam sorkar chuan Thawhṭanni leh Thawhlehni khan Hojai district-a Lumding Reserve Forest huama ram hectare 500-a dan loa cheng nia sawite sawnchhuah hna a kalpui leh.

State sorkar hian September thlaa Gauhati High Court-in forest area-a dan loa chengte sawnchhuah hna kalpui tura hriattirna a lo pek tawh bawhzuiin hma hi a la a ni.

Chief minister Himanta Biswa Sarma chuan Thawhṭanni tlai lam thleng khan forest area huam chhunga cheng zing ami 1,000 vel chu an awmna hi an chhuahsan tih sawiin, helai hmuna aieng hmun siamtu leh sorkarin chhuahtir a tum avanga FIR thehluttu, Nazrul chu a awmna chin hriat lohin a bibo mek tih a sawi.

Report chuan Nazrul hian forest, political official leh political leader eng emaw zat a tham hnuah aieng hmun hi siamin, mi tam tak a chhawr niin a tarlang. Forest area-a chengte hi Nagaon, Barpeta leh Dhubri district aṭanga kal, Nazrul-an a hruai luhte an nih thu CM chuan a sawi. Kum tam tak chu forest area huam chhunga thingkung tam tak kih an nih thu a sawi a, Nazrul hi man anih hunah a thurualpui dangte pawh thu zawhfiah an ni thei ang, a ti.

Forest area-a chengte sawnchhuah hna thawk tur hian Assam sorkar chuan police leh CRPF 1,000 vel a tir a ni. Hojai superintendent of police Barun Purkayastha chuan security force tam tham tak tirh an nih chu thil danglam vak a ni lo tih sawiin, boruak ṭha lo a thlen palh venthawnna vang a ni tih a sawi. Mahse Lumding Reseve Forest huam chhunga chengte zingah chhungkaw tam zawk chu an chhuah nghal mai avangin boruak pawh a pangngai hle tih a sawi.