Meghalaya: Ranikor-ah Congress flag la thla, NPP flag zar

Meghalaya-a Ranikor constituency-ah Thawhlehni khan Congress flag lakthlak a ni a, National People's Party (NPP) zar a ni thung.

He constituency-a Cong­ress thlawptute hian Thawh­lehni khan a huhoin Conrad Sangma kaihhruai National People’s Party an zawm a ni.

Chief Minister Conrad Sangma chuan hemi ni hian helai constituency hi a tlawh a, sitting Congress MLA Martin M Danggo chuan lo lawmin Chief Minister hnenah hian memorandum, Ranikor-a Civil Sub-Division din tura ngenna an thehlut nghal bawk. Ranikor hi South West Khasi Hills-a awm a ni.

Meeting neihnaah hian Congress block unit chu ṭhiah niin Block President leh General Secretary ten an ṭhiat.

Hetih lai hian bialtu MLA, Congress legislator Martin M Danggo pawh hian NPP hi a zawm dawn nia sawi a ni a, Congress aṭang hian official-in banna la thehlut lo mah se Thawhlehni thil thleng hian a tichiang hle nia sawi a ni.

He hunah hian Deputy Chief Minister Prestone Tyn­song, Home Minister James K. Sangma, C&RD Minister Snaiwbhalang Dhar leh mi pawimawh ṭhahnem tak an tel niin report chuan a tarlang.