Manipur-ah hel 2 man, 1 kaphlum

Manipur police-te chuan thuchhuah siamin Thawhṭanni zan khan security force-te leh United Tribal Liberation Front (P) hel pawl ni ngeia hriatte chu Jiribam district an inkah thu an sawi.

Police-te chuan he in­beihnaah hian hel pahnih manin pakhat an kaphlum bawk tih an sawi a ni.

Jiribam district-a Kuran Madrassa Ahme­dabad-ah Thawhṭanni zan, zanrei tawh takah khan security force-te leh hel te hi an inkah thu an sawi a, mi pahnih erawh an tlanchhe hman a ni. An mi kahhlum hi Khotinthang Hangmi (40), Churachandpur district-a Tingpan khaw mi a nih thu an sawi bawk.

An mi man te kut aṭang hian pistol pakhat, M16 rifle pakhat leh Chinese hand grenade pakhat an man tih an sawi a, Jirabam police station-ah thubuai an ziaklut tawh tih an sawi bawk.