National Anthem phuah laiin hmarchhak hi Bengal-ah a bet : BMS Secretary

Nobel Laureate Rabindranath Tagore-an India hnam hla, India National Anthem-a phuahah hian hmarchhak state pakhatmah hming lam a nih ve loh avang hian inhnialna leh zawhna tam tak a awm ṭhin. State hming a lang lo mai ni loin hmarchhak chhunga luang lui emaw hmun hmingthang hming pawh pakhatmah a tel lo.

Hemi chungchang hi Bharatiya Mazdoor Sangh (BMS) hmarchhak sec­re­tary Sunil Kirwai chuan Thawhṭanni khan sawi chhuakin Tagore-an National Anthem a phuah lai khan hmar­chhak chu Bengal-ah a bet tih a sawi.

BMS hnuaia hnathawkten state convention an neihnaah thu sawiin BMS Secretary chuan Gurudev Rabindranath Tagore chuan national anthem-ah khan ‘Banga’ (Bengal) tih a telh thu sawiin hei hi hmarchhak state a sawina a ni, a ti.

Tagore researcher Bikach Chau­dhury chuan Mazdoor Sangh thusawi hi chhanglet nghalin BMS Secretary thusawi hian historical basis a nei lo tih a sawi ve thung.

Chaudhury chuan hmarchhak chu Bengal-ah a beh ngai loh thu a sawi a, East Bengal leh Assam chu province pakhat hnuaiah Syhlet-ah an awm ngei ṭhin a ni, a ti. Chaudhury chuan Manipur leh Tripura chu Lal nei an nih ṭhin thu leh khatih hunlai khan Nagaland a la awm lo tih a sawi. Hemi a nih avang hian hmarchhak chu Bengal peng pakhat a nih theihna a awm lo a ni,a ti bawk.

Hetihlai hian mi ṭhenkhat chuan Tagore hian King George V lo lawm nan helai thu hi a belh mai niin an sawi ve thung a, he hla sak a nih hmasak ber December 27, 1911 ni tak khan India a rawn thleng a ni.