Tripura civil poll : Seat 112-ah chuhtu awm loin BJP an chak nghal

Tripura civic body inthlan neih turah, rorellai BJP chu seat awm zat 334 aṭangin seat 112-ah chuhtu awm loin an chak nghal tih Election Department official chuan a sawi. Inthlan hi November 25-ah neih tur a ni.

Chuhtu dang awm loa BJP chakna zingah hian Bishalgarh, Udaipur, Mohanpur, Ranirbazar, Santirbazar, Kamalpur leh Jirania nagar panchayat-te an tel.

Inthlan ngaihna tur seat 222-ah hian candidate 785 an awm dawn tih official-te chuan an sawi.

Communist Party of India-Marxist (CPI-M) secretary Jitendra Chaudhury chuan BJP mi leh sate eptute bei a, tharum thawhna an thlen fo avangin civil body pasariha inthlan neih turah an party candidate-te chuan nomination an thehlut thei lo tih a sawi. "Kan party worker-te beih an ni a, inthlan neih hun tur puan a nih aṭanga tharum thawhna a thleng chhoh avangin municipal council pangaa kan party candidate turte chuan nomination paper pawh an thehlut thei lo a ni," a ti.

A puhna hi BJP thupuangtu Nabendu Bhattacharya chuan chhang letin, eptu pawlte chuan candidate an siam theih loh chungchangah an party chu mawhpuh tur a ni lo tih sawiin, chuhtu dang awm loa chak nghal chu an duhdan ber pawh a ni lo tih a sawi ve thung. "CPI-M hian an chak lo tih an pawm a ni. Chuhtu awm loa chak mai hi kan duh bik lo. CPI hi engmah an ni tawh lo , thil sawisel chiah hi an thei tawh a ni. An sorkar laia an thiltihah pawh keini pawh min mawhpuh zel a ni," tiin a sawi.