Nagaland CM-in 'People's bridge' a hawng

Nagaland chief minister Neiphiu Rio chuan Thawhlehni khan Tuensang district-a Yinjung lui chunga feet 70-a thui lei dawh, 'People's Bridge' tih chu Kohima-a Hotel Vivor aṭangin a hawng.

He lei hi thla 16 chhung dawh hna thawh niin, Eleutheros Christian Society (ECS), Hans Foundation, sorkar department hrang hrang, Assam Rifles, Border Roads Organisation, MLA leh tualchhung mite thawhhnona hmanga an siam a ni.

Chief Minister Rio chuan mipuite inlungrualna, sorkar department leh agency-te thawhhona ṭha tak avangin an hmalakna chu a hlawhtling thei tih a sawi.

Kum 2014 aṭang khan Yinjung lui kaltlang ngai khaw pariatte chuan an inkalpawhna awlsam zawk siam a nih theihna turin lei dawh tur hian hma an la ṭan a ni. Lei hi dawh a nih loh chuan heng khuate hian an hnaih ber, Longpang-a Primary Health Centre (PHC) pan turin darkar thum chuang hun an hman a ngai a ni.

Tualchhunga hmanrua an neih angin lei hi an dawh hmasa a, mahse a hnu lawkah tuilianin a len chhe leh nghal mai a ni. Hemi hnu hian lei ṭha zawk dawh tur hian ruahmanna an siam a, feet 70-a sei lei an dawh bakah link road km 10 an siam bawk a, an sum senso 60% hi Hans Foundation-in a tumsak a ni.