Covid vaccine la tura mipuite zirtir turin AP sorkarin sakhaw hruaitute a ngen

Arunachal Pradesh sorkar chuan state chhunga sakhaw hruaitu hrang hrang leh mi lar dangte chu state sorkarin puitling chin Covid-19 vaccine pek kim vek tuma a hmalaknaa thawhpui a, mipuite pawh vaccine la tura nawrpui turin a ngen.

Thawhlehnia sakhaw hrang hrang aiawhte nena virtual meeting an neihah, health minister Alo Libang chuan vaccine pek chhuah hi chak zawka kalpui an ngai tih sawiin, vaccine la thei chinten an lak vek theihna tura mipuite zirtirna kawngah sakhaw hruaitute chu an dinhmun a pawimawh hle a ni, a ti. He meeting-ah hian Kristian, Islam, Hindu pawl hrang hrang aiawhte bakah tualchhung sakhua, Donyi Polo hotute leh self-help group aiawhte an tel.

AP-ah hian vaccine chungchanga thu dik tawk lo thehdarh vangin vaccine la duh lo hi eng emaw zat an awm niin official-te chuan an sawi.