Meghalaya-ah district thar hawng

Meghalaya-a Mairang Civil Sub-Division chu district puitlingah hlankai niin, district 12-na tur Eastern West Khasi Hills district chu Nilaini khan hawn a ni ta.

Chief minister Conrad K Sangma chuan Eastern West Khasi Hills district hi headquarters Mairang-ah a hawng a, he hunah hian MLA leh cabinet minister ṭhahnem tak an tel. District thar deputy commissioner hmasa ber turin Wilfred Nongsief chu ruat a ni a, Maxwll B Syiem chu superintendent of police hmasa ber atan dah a ni bawk.

CM chuan a kaih­hruai sorkar chuan state hmasawnna turin theihtawpin hma a la zel tih a sawi a, Mairang bial mipuiten district puitlinga hlankai an mamawh leh an duh dante pawh a hre thiam hle tih a sawi. District thar hming chu social media lamah sawiselna a tam hle a, hei pawh hi sawi langin CM chuan thil engkimah sawisel tawk hi an awm reng a ni, a ti.

"District ṭha tak din a nih theihna tura rawtna siam aiin, mipuiten district hming ringawt an buaipui hi pawi ka ti hle a ni. Sawiselna thu social media lama post hi thil awlsam tak a ni. Hetih lai hian mipuite nunphung chawi kan a, hna thawk tur hian thil post ringawt aia tih tur tam tak a awm tih an hriatthiam a ngai a ni," tiin Sangma chuan a sawi.

Sangma chuan district hming phuah tur chungchangah meeting pawh vawi tam tak an neih thu leh, mipui lam pawh biakrawn an nih thu a sawi. Cabinet chuan matrilineal society an nih avangin hemi lam kaihhnawih lantirna awm se an duh a, he district hi West Khasi Hills khawchhak lama awm a nih avangin Eastern West Khasi Hills tih a ni ta a ni, a ti.

District thar hi square kilometer 1,300-a zau niin, Mairang hnuaiah khaw 160 leh Mawthadraishan hnuaiah khaw 58 a awm a ni.