Assam MP-in free ration scheme chhunzawm turin PM ngen

Assam Pradesh Congress Committee president hlui, Rajya Sabha MP ni lai Ripun Bora chuan prime minister Narendra Modi hnenah sorkar laipuiin Pradhan Mantri Garib Kalyan Anna Yojna (PMGKAY) hnuaia a thlawna buhfai a sem chu ram economy dinhmun a ziaawm hma chu chhunzawm turin a ngen.

India rama Covid hripui a len hnuah, union cabinet chuan April thla khan PMGKAY hnuaiah thla riat, April - November chhung chu mi retheite hnenah a thlawnin thla tin buhfai/wheat kg nga pek a lo rel tawh a ni. Mahse Bora chuan November 30 hnu lamah pawh he scheme hi kalpui chhunzawm turin PM hnena lehkha a thawnah a ngen a ni.

Bora chuan tun hnaia union food secretary-in November hnu lamah free ration scheme chhunzawm a ni tawh dawn lo nia a sawi chuan, he hamṭhatna dawngtute a tichiain, chhungkaw tam tak rilru hah takin an awm a ni, a ti. Khuahkhirhna hrang hrangte kalpui a lo nih avangin ram chhung dinhmun chuan ngai a la awh lo hle, pawisa tihthih leh ruahmanna fel fai tak awm loa hri leng vanga kum khat chuang lockdown puan chuan ram economy a la nghawng zel a ni, a ti.