Assam-in tun thla chhungin vaccine pek kim hman beisei

Assam sorkar chuan November 27 hmain state chhunga Covid vaccine la thei chinte chu pek kim hman a beisei.

State health minister Keshab Mahanta chuan kum 18 chung lam zingah Covid vaccine dose khatna la lo hi nuai 10 vel an la awm a, heng mite hi November 27 hmain pek kim hman an ni ang, a ti.

November 8 aṭang khan state health department chuan vaccine pek chhuahna kawngah 'Ghore Ghore Podarpon' programme kalpui ṭanin, he programme hnuaiah hian chief minister pawh huamin minister zawng zawng, chief secretary, deputy commissioner, superintendent of police leh sorkar official hrang hrangte chu polling station an vil tur siamsakin, vaccine pek chhuah dante an enpui ṭhin a ni.

November 2031 chhungin a thawh khatna atan ASHA worker, Anganwadi worker, Goan Burah , Village Defence Party (VDP)-te telna team-te chuan polling station an chanpual huam chhunga in tin tlawhin, chhungtinte vaccine lak dan dinhmun an enfiah dawn tih Minister chuan a sawi.

A thawh hnihna hi November 22-27 chhung kalpui lehin, chief minister bakah minister dang zawng zawng, MLA, MP, chief secretary bakah civil leh police official-te chuan polling station pakhat tal ṭheuh tlawhin, vaccine an la kim tawh em tih an enfiah dawn bawk.

Assam-ah hian vaccine la thei, kum 18 chin hi vaibelchhe 2.13 vel an awm a, an zinga 95% dawn chuan a dose khatna hi an la tawh a ni.