Tripura police-ten UAPA an hman chungchang SC-in ngaihtuah a remti

Tripura police-ten dan khauh tak, Unlawful Activities (Prevention) Act (UAPA) hnuaia thubuai a siamsak chungchanga lawyer, activist leh journalist-ten Supreme Court-a petition an thehluh chu nimin khan court-in ngaihtuaha remti.

Chief justice of India NV Ramana awmna bench chuan petition thehluttute aiawh, advocate Prashant Bhusan chu high court-ah thehlut tura a hrilh zet hnuah ngaihtuah a remti leh ta a ni.

Petition thehluttute hian Tripura-a October thla chawhnu lama Muslim mite laka tharum thawhna thleng kaihhnawiha social media lama an thil post-te avangin an lakah heng thubuai hi siamsak an ni tih sawiin, police-te chu UAPA hi dik lo taka hmangah an puh a ni. An laka FIR ziahluhte pawh sut nghal turin an phut bawk.