Manipur CM-in COVID-19 Vaccine Express vailiam

Manipur chief minister N Biren Singh chuan Ningani khan Imphal-a Khuman Lampak Indoor Stadium-ah state chhunga door-to-door Covid vaccination drive kalpuina tur hawngin, Covid-19 Vaccine Express motor 80 a vailiam.

Covid-19 Vaccine Express-te hi state chhung district 13-ah kal kualin, vaccine la thei chinte chu an kawtkaiah ngei vaccine an pe dawn tih CM chuan a sawi.

Hemi hma hian Chief Minister chuan Imphal West, Imphal East leh Senapati district-ah vaccination vehicle 40 a lo vailiam tawh bawk.

CM Singh chuan, "Prime minister Narendra Modi kaihhruaina hnuaiah Manipur state chuan vaccine hi nuai 20 chuang kan pe chhuak thei tawh a, a lawmawm hle a ni," a ti. Vaccine la thei chinte chu la vek tura ngenin, hri leng dona kawnga sorkar hmalakna chu thawhpui turin a sawm.

District hrang hranga vaccination motor hmanga vaccine pek chhuah runpui neih turah hian NGO, Care India chuan an CSR program hnuaiah motor 120 bakah staff ṭhahnem tham tak an thawh a ni.

November 10 thleng khan Manipur-ah hian mi 20,33,082 hnenah Covid vaccine pek a ni tawh a, an zinga 12,56,919 te chu dose khatna la niin, dose kima la tawh hi mi 7,76,163 an awm tawh.