Sikkim : Ad-Hoc teacher kum 8 thawk tlingte dah nghet dawn

Sikkim chief minister Prem Singh-Golay chuan Ningani khan an state-a ad-hoc teacher, a zawna kum riat thawk tling tawhte chu dah ngheh an ni dawn tih a puang.

Education Deparment-in hriattirna a tihchhuahah CM hian he thu hi a sawi a, kumtin ad-hoc teacher kum riat thawk tlingte chu dah nghet chhoh zel an ni dawn tih a sawi a ni.

Chief Minister chuan, ad-hoc teacher-te hian sorkar hmasa hun lai aṭang tawhin dah nghet hi phutin, boruak ṭha tak hnuaiah sorkar pawh an lo nawr fo tawh tih a sawi. Mahse sorkar hmasa khan an thil phutte hi a ngaihven sak lo a, zirtirtute harsatnate pawh chu a ngaihven pui lo nia sawiin, hruaitu hmasate kha an huaisen tawk lo a ni, a ti.

Hriattirna tihchhuahah hian zirtirtute dahnghehna tur, ‘Sikkim Adhoc Teachers Regularisation Policy 20210 chu National Council for Teacher Education (NCTE) kalphung anga siamin, ad-hoc teacher lak chungchang chu Sikkim State Teachers’ Recruitment Board (SSTRB) kutah dah a ni. Kumtinin December 31-ah an service-te ennawnin, kum riat thawk tling tawhte chu dah ngheh chhoh zel a ni ang.