Manipur-ah firfiakte'n sipai an lambun AR CO, a nupui leh fapa bakah sipai 4 an thi

Manipur-a Churachandpur district-ah khan firfiakten sipai an lambun a, 46 Assam Rifles commanding officer, Col Viplav Tripathi, a nupui leh a fapa kum riat mi bakah quick reaction team-a sipai pali an thi.

Sipaite lambuntu hi eng pawl mahin an tih a nih thu an la sawi lo a, mahse Manipur firfiak pawl People's Liberation Army te tih nia rin a ni.

CO Tripathi hian international border-a forward camp tlawhin, civic action programme te a enpui a, an haw lam chu Singngst sub-division-a S Sehken khaw bulah Inrinni zing dar 10:30 vel khan firfiakte hian convoy hi an lo lambun a ni. Firfiakte hian convoy beihna atan hian improvised explosive devices (IED) tipuakin, a hnuah silaiin motor-a chuangte chu an kap zui a ni.

Manipur chief minister N Biren Singh chuan 46 AR convoy beih a nih chu a dem tak zet tih sawiin, pawikhawihtute man chhuaha hremna pek an nih ngei theihna turin state forces leh paramilitary forces te chuan beihpui an thlak nghal tih a sawi.

Prime minister Narendra Modi pawhin Manipur-a pawikhawihna thleng chu a dem thu leh, sipaite inpekna chu theihnghilh a ni ngai dawn lo tih a sawi a ni. Defence minister Rajnath Singh pawhin sipaite beih an ni chu a dem thu leh, thi chhungte a tuarpui thu a sawi.

Union home minister Amit Shah chuan Manipur-a Assam Rifles convoy beih a ni chu a dem thu leh, sipai huaisente thihna chu a thlawn mai dawn lo tih a sawi bawk.

Kum 2015, June 4 khan Naga army, KYKL leh KCP-te chuan Manipur-a Chandel district-a Tengnoupal-New Somtal road ah 6th Dogra Regiment convoy an lo lambun tawh bawk a, sipai 18 thiin mi 11 in hliam an tuar a ni.