Assam-ah DNLA hel 46 inpe

Assam sorkar nena inremna kawng zawnga an hmalakna kal zelah, Dimasa National Liberation Army (DNLA) helpawl member 46 te chu Inrinni liam ta khan sorkar kutah an inpe.

DNLA hi Dima Hasao district-ah an chetla ber a, September 7 khan chief minister Himanta Biswa Sarma-a'n muanna siam tura a sawmna chhangin, thla thum chhung atan inkahhai an puang a ni.

September 24 khan sorkar nena inremna kawng zawnga inbiakna nei turin an pawl chairman Edika Diphusa, a deputy Juddychan Haflongbar leh general secretary Prithamjit Jidongsa te chu an rawn kal chhuak a ni. Ceasefire camp peihfel a nih hunah an pawl member 300 chuang an rawn chhuak leh dawn tih self-styled area commander Naiding Dimasa chuan a sawi.

DNLA hi kum 2019 kumtir lama din a ni a, Dimasa hnam tana independent ram an sual a ni. Kumin August 27-a Dima Hasao district-a lungalhthei phurtu truck-te beih an nih a, driver panga an thihnaah khan an inhnamhnawih nia sawi a ni.