Tripura-ah MHA team an kal

Ministry of Home Affairs (MHA) hnuaia border management team chuan Inrinni khan Tripura an thleng. Bangladesh border-a project thawh mek leh infrastructure dinhmunte an enfiah.

Tripura sorkara under secretary, D Roy chuan MHA team hian Inrinni khan Agartala-ah chief secretary, Border Security Force (BSF) official leh stakeholder-te meeting an neihpui tih a sawi. Nimin khan BSF helicopter hmangin Dhalai district-a border area an tlawh a, infrastructure project thawh mekte an endik. Dhalai district-ah hian National Project Constructiom Corporation Limited (NPCC) hnuaiah Bangladesh ramri hung hna thawh mek a ni.

MHA team hian South Tripura district-a hun rei tak ramri hung hna tihkhawtlai tawhna pawh tlawhin, Sepahijala.district-a ramri hung loh lai awm chu an enfiah leh bawk.

Tripura leh Bangladesh ramri hi km 856-a thui niin, heng zinga km 67 chu hung an la ni lo. Hung vek tura tih ni mah se chhan hrang hrang vangin tikhawtlai an la ni. Kumin January thla khan Tripura chief minister Biplab Kumar Deb chuan union home minister Amit Shah hnenah ramrite hung fel vek an nih thuai theihna tura inrawlh turin a lo ngen tawh a, Amit Shah pawhin hma lakpui a lo remti a ni.