Manipur : Firfiakte lakah beihpui thlak chhunzawm zel

Manipur-a firfiakten Assam Rifles convoy bei a, mi pasarih an kahhlum hnuah security force-te Myanmar ramri bul, Churanchandpur district ram hnuaiah pawikawihtute hi man ngei tumin beihpui an thlak chhunzawm zel.

Official-te chuan beihpui thlak hna hi Assam Rifles leh state police-ten an kalpui mek a, Inrinnia AR convoy ambush-na, Sekhen khaw chhehvel pawh ngawrh takin an dap mek tih an sawi.

Manipur Naga People's Front (MNPF) leh People's Liberation Army (PLA) chuan sipai convoy beitute an nih thu a sawi tawh. Thuchhuah inṭawm an siamah, MNPF leh PLA chuan convoy an beihah hian Colonel Viplav Tripathi nupui leh a fapa hi an tel ve tih an hriat loh thu sawiin,"Ram buaina hmunah chuan an chhungte leh naupangte hi kal tel ve tur an ni lo," an ti. PLA chief chuan sipai lambunnaah an mi leh sa telte chu lawmpuina a hlan nghal bawk.

PLA hi kum 1978 chhoa din niin, helpawl hlauhawm ber pawl an ni ṭhin a, mahse Inrinnia pawikhawihna thlen hma hian kum ruk vel chu thawm an nei vak tawh lo a ni. MNPF hi kum 2013 June thlaa United Naga People's Council leh Manipur Naga Revolutionary Front inchhunfinten an din a ni bawk. Manipur-ah hian danpawna hnawl, inlakhran duhtu pawl hi 40 chuang zet an awm a, mahse a tam zawk chuan sorkar nena inkahhai an puang tawh a ni.

Manipur chief minister N Biren Singh chuan a kaihhruai sorkar chuan firfiaka chetna thleng ṭhinte chu a enliam mai mai dawn lo tih sawiin, Myanmar nena an inrinaah pawh venhim hna hi khauh zawka kalpui a ni dawn tih a sawi. Myanmar aṭanga dan kalha ramri kaltlanga India rama lut ṭhinte danna tur leh, ramri chhehvela dan kalha chetna thleng ṭhin venna turin sorkar chuan ramri hung hna chu a hna pawimawh berah a nei dawn tih a sawi nghal bawk. Myanmar leh Manipur inrina hi km 400 vela thui niin, union home ministry chuan ramri hung hna hi a thawk ṭan tawh a, mahse hmun ṭhenkhat chu buaina a awm avangin thawh chhunzawm a ni rih lo.

Police leh intelligence official-te chuan pawikhawihtute hi Myanmar aṭanga rawn lutin, sipaite an beih hnuah hian ramri lamah an kir leh nghal nia a lan thu an sawi.

Firfiakten an lambunaa thi, Colonel Viplave Tripathi, a nupui leh a fapa bakah sipali pali-te ruang chu Imphal-a thlahna hun hman a nih hnuah an khaw lamah phurh haw an ni. Col Tripati-te chhung hi Chhatisgarh-a Raigarh khua an ni a, sipai dang thite hi West Bengal, Assam, Nagaland leh Rajasthan amite an ni.