Sikkim-in zirtirtu hmeichhiate tan kum 1 maternity leave lak phalsak

Sikkim chief minister Prem Singh Tamang-Golay chuan state chhunga zirtirtu hmeichhiate tan kum khat chhung nau neih chawlh, maternity leave lak phalsak an nih thu a sawi a, mipate chu paternity leave thla khat lak phalsak an ni bawk tih a sawi.

Maternity leave late hi an chawlh lak chhungin an aiawh lailawktu tur, substitute teacher lak an nih zel tur thu Sikkim CM chuan a sawi bawk.

CM Golay chuan Sikkim education system chu a quality a ṭha tawk hle tih sawiin, a kaihhruai sorkarin a tum ber chu zirlaite tan campus ṭha tak siam a, zirtirtu rintlak leh facility ṭha ber berte pek an nih thu a sawi. Hemi atan school-a subject thar zir belh a, school leh university-te infrastructure ṭha tak nena sak tharte chu thil ṭul tak a nih thu a sawi a ni.

Geyzing Degree College chu kum khat chhungin peihfel a nih tur thu leh, Sikkim State University chu Kanchenjunga State University tia thlak a nih tur thu CM chuan a sawi a, education system chawikan zelna turin private university tam zawk pawh din tum a ni, a ti.