Meghalaya sorkarin Nongkhnum Island chei nan Rs vbc 13 ruahman

Meghalaya chief minister Conrad K Sangma chuan tourism lam tihchangtlunna turin West Khasi Hills-a Nongkhnum Island cheina atan sorkarin special package, cheng vaibelchhe 13 a siam thu a puang.

Nongkhnum hi Asia-a river Island lian ber dawttu a ni a, Chief Minister hian Thawhṭanni khan a chhungte nen he hmun hi an tlawh a ni. Nongkhnum Island hi district headquarters, Nongstoin aṭanga km 14 vela hlaa awm a ni. Khualzinte tlawh nasat ṭhin ni mah se, infrastructure lam ṭhat tawk loh vangin khualzin tlawhtu pawh hi an tlahniam sawt hle nia sawi a ni.

Chief Minister chuan Nongkhnum Island special package hi New Development Bank (NDB) aṭangin pek a ni dawn tih a sawi. NBD hian Meghalaya-a tourism tihmasawnna tur hian Rs vbc 700 chuang an pe a ni.

Chief Minister hian Nongstoin-ah Meghalaya sorkar flagship programme, Farmers’ Collectivization for Upscaling of Production and Marketing Systems (FOCUS) hnuaia din Producer Groups (PC) te chu hun hmanpuiin, state chhunga loneitute pualin sorkar chuan cheng vaibelchhe 200 a ruahman thu a sawi. Loneitute mamawh leh harsatna tawh hrang hrangte pawh a hriatthiampui thu te sawiin, an eizawnnaah hlawkna ṭha zawk an neih theihna turin policy pawh an siam thu a sawi.

West Khasi Hills district-ah hian Producer Groups hi kumin March thla aṭang khan din ṭan niin, tunah hian group 183 an awm tawh a ni. CM leh bialtu MLA Macmillan Byrsat-te chuan PG 36 hnenah FOCUS programme hnuaia puihna Rs 21,95,000 an pe nghal a ni.

CM chuan district tan kawngpui ṭha zawk siam tura hma lak a nih thu leh, Greater Nongstoin Water Supple Scheme pawh peihfel a nih dawn hnaih thute a sawi bawk.