Tripura : Journalist hmeichhe 2-te bail dilna pawmsak

Tripura police-ten tualchhung buaina chhuak chungchang an report avanga thubuai an siamsak, hmeichhe journalist pahnih Samrdidhi K Sakunia leh Swarna Jha-te chu man an nih hnuah district court chuan bail an dilna a remtihsak.

Journalist pahnihte hi Assam-a Karimganj district-ah man an nih hnuin Tripura-ah hruai an ni a, Thawhṭanni khan Udaipur Chief Judicial Magistrate Court-ah hruai a ni.

Police-te hian right wing group, Vishwa Hindu Parishad (VHP)-ten rally an huaihawt ṭuma buaina chhuak chungchanga an report danah, VHP thlawptu Kanchan Das-a complaint thehluh behchhanin journalist pahnihte hi thubuai an siamsak a ni. Das-a hian Sakunia leh Jha-te hian Pal Bazaar area-a Muslim mite an tlawh ṭumin, Hindu-te huatna thu leh, mipuite fuihpawrh hawi zawngin thu an sawi a ni, a ti. Das chuan journalist-te hian mosque hal a nih chungchangah Vishwa Hindu Parishad leh Baijran Dal-te chu an mawhpuh a ni, a ti bawk.

Tripura police-te hian tualchhunga buaina chhuak kaihhnawihah social media lama thil post vangin tun hnaiah mi tam tak thubuai an lo siamsak tawh a, an zingah hian Supreme Court lawyer leh activist-te pawh an tel.

Police official-te chuan journalist pahnihte hi thubuai siamsak an nih hnuah Agartala-a police-te hmaa inlan tura an tih thu an sawi a, mahse Assam lam an pan avangin an umzui a, Pathianni khan Karimganj-ah an man tih an sawi. Sakunia leh Jha-te hi HW News Network-a thawk niin, Tripura-ah hian tualchhung buaina a thlen hnuah thil awmdan enfiah leh report turin an kal a ni.

Journalist-te thubuai siamsak leh man an ni hi Editors Guild of India (EGI) leh Indian Women’s Press Corps (IWPC) chuan an dem thu sawiin, chhuah thuai tura an phut thu an sawi. Police-te chet dan an dem thu sawiin, journalist-te hian zalen tak leh hlauhthawnna awm loin an hna thawh theih an phut thu an sawi bawk.