Union Cabinet in North Eastern Council thuamthar remti ; Union Home Minister Chairman ni dawn

Prime Minister Na­rendra Modi kaihhruaina hnuiaa Union Cabinet mee­ting, Nilaini-a neihah North Eastern Council (NEC) thuamthar tura rawt­na awm chu pawm a ni.

Ministry of Develop­ment of North Eastern Region (DoNER) in Union Cabinet-a propo­sal a siam, Union Home Minister NEC ex-offi­cio Chairman atana no­mi­nation an siam chu cabi­net hian an pawm sak.

Cabinet hian Minister of State (Independent Charge), Ministry of DoNER chu Vice Chairman ni nghal tura ruahmanna awm chu an pawm bawk.

North Eastern Council hi statutory body niin hmarchhak state pariat-a Governor leh Chief Minister zawng zawng te chu member an ni vek a ni.

NEC hian State leh Central agency kaltlangin project an kalpui ṭhin a ni. Hemi anih avang hian Home Minister Chairman a nih a, DoNER Minister Vice-Chairman a nih bawk a, Chief Minister leh Governor zawng zawng member an nih bawk chuan thil pawimawhah pawh huamzau zawkin thil a rel theih dawn niin Prime Minister website chuan a tarlang a, hmalam huna an kal zel dan tur relna kawngah pawh awlsam zawkin hma an la thei dawn niin an tarlang.

NEC chuan inter-state issue hrang hrang, drug trafficking, ralthuam tawlh ruk leh ramri buaina te chu awlsam zawkin an chingfel thei tawh dawn niin an tarlang bawk.

North Eastern Council thuamthar hi hmarchhak tan chuan a ṭha hle dawn niin an tarlang tel a ni.

NEC hnuaia project kalpui te hi Council chuan a khat tawkin a ennawn reng tawh dawn bawk.

NEC hi North Eastern Council Act, 1971 hnuaia din niin 2002 khan hmar­chhak tan regional planning body atana tih a ni.

Prime Minister Narendra Modi chuan Ningani khan a Council of Mi­nister zawg zawng, mi 73-te nen meeting an nei a, NDA sorkar hma­lakna hrang hrang-te an thlir ho a ni.