Shillong-ah Curfew thlahdul hrih dawn ; Mobile Internet pawh hman leh theih tawh

Meghalaya state khawpui Shillong-a buaina chhuak vanga karhnih dawn zet mai curfew puan a nih hnuah district thuneitute chuan curfew chu an thlahdul hrih dawn tih an sawi a, mobile internet pawh a hman leh theih tawh a ni.

District Magistrate chuan Ningani aṭangin CrPC Section 144 hnuaiah night curfew, zan dar 10 aṭanga zing dar 5 thleng thu leh awm hma chu an puang dawn tih an sawi. Night curfew hi a hma kha chuan tlai dar 4 aṭangin a inṭan ṭhin.

District Magistrate, East Khasi Hill District chuan Lumdiengjri Police Station thuhnuaia awm china awm Jaiaw, Mawkhar, Umsohsun, Riatsamthiah, Wahingdoh, Mission, Mawprem, Lumdiengjri, Lamavilla, Qualapatty, Wah­thapbru, Sunny Hill, Cantonment, Mawlong Hat bakah Cantonment Beat House Area (Umshyrpi bridge chin tel lo)-ah curfew hi an thlahdul hrih dawn tih Nilaini khan an sawi a, a enchhin nan nimin nileng khan curfew hi an thlahdul a ni.

Congress thupuangtu Zenith Sangma chuan mobile internet block a nih chu an sawisel a, zirlaite pawhin an assignment tihna turah harsatna an tawh phah nasa hle tih a sawi a, an assignment online-a theluh ngai te chua tih khaihlak tih a sawi.

Hetihlai hiah Nilaini aṭang khan mobile internet pawh a hman leh theih tawh a, boruak pawhin ziaawm lam a pan zel a ni.

Zenith Sangma chuan NPP kaihhruai sorkar chu sawiselin an rorel danah an lawm loh thu a sawi a, mobile internet block hian zirlaite a tibuai nasa hle tih a sawi.