Hmarchhakah ruahsur nasa vangin chhiatna thleng nasa ; Assam-ah mi pathum in nunna chan

Hmarchhak hmun hrang hrangah ruahsur nasa vangin chhiatna a thleng nasa hle a, Assam-ah chuan mi pathum in nunna an chan tawh niin report chuan a tarlang.

Assam:
Assam Disaster Management Authority chuan Ningani chawhnu lam khan Assam-a district pasarih-te chu ruahsur nasat vanga tuilian leh leimin hian a nghawng nasa hle tih an sawi. Golaghat, Hailakandi leh Cachar-a revenue cirlce pali chu a nghawng nasa zual a, Karbi Anglong East leh Karimganj-a revenue cirlce pahnih pawh nasa taka nghawngin Hojai leh Karbi Anglong West district-a revenue circle pakhat ve ve a nghawng bawk. Dispur chuan relief camp 116 an hawng tawh nghe nghe.

Golaghat district-a mi pakhat in nunna a chan tawh thu leh Dima Hasao district-ah mi pahnih an thih tawh thu report a ni. Lumding leh Badarpur inkarah hmun nga vel laiah leimin a awm avangin Barak Valley leh Tripura-a rel service ṭhenkhat te chu tihtawp hrih a ni bawk.

Hailakandi leh Karimganj district-ah tuilian hi nasa zualin mi 50,000 vel a nghawng a, thingpui huan eng emaw zat a chim tawh a ni. Karimgank distroct chhunga awm Patherkandi constituency chhunga lui lian pathum Longai, Singla leh Kushiara te chuan an kuang an zauh nasa tawh hle a, hlauhawm chin chhinchhiahna an pel vek tawh.

Dima Hasao-ah chuan tuilian hian mi pariat a la a, panga chu chhuanchhuah hman an ni a, midang pathum erawn zawn mek an la ni bawk.

Manipur:
Manipur-ah pawh ruahsur nasa avanga chhiatna thleng thei laka inven nan Governor chuan Ningani leh Zirtawpni kha office leh zirna in zawng zawngah chawlh a puang. Hetih lai hian chawlh puan hian police, fire service, water resources, health and family welfare department, damdawi in, revenue depart­ment, PWD, PHED, municipalities, deputy commi­ssioner office leh subdivisional officer te chu a huam tel lo thung. NH-37 (Imphal-Jiribam kawngpui) pawh leimin in a hnawh vek a ni.

Tripura: mi 25,000 in chenna chhuahsan

Tripura-ah chuan ruahsur nasat avangin darkar 24 chhungin chhungkaw 3,500 in an chenna in an chhuahsan tih Nilaini-a official thuchhuah chuan an tarlang.

Tripura-ah hian ruahsur nasat avangin tui a lian nasa hle a, Gomati, South Tripura, Khowai, Dhalai leh West Tripura district-te chu nasa taka nghawngin mi 25,000 vel chuan an chenna in an chhuahsan tawh niin report chuan a tarlang. Heng mi te relief camp-ah an awm thu an tarlang bawk.

Chief Minister Biplap Kumar Deb chuan Nilaini khan helicopter hmangin tui lenna hmun te hi a enkual a, tuilian in a nghawng chhungkua-te chu zángnadawmna cheng 5,00,000 ṭheuh pek an ni dawn tih a sawi.